नंदेश्वर / प्रतिनिधी : तालुका काँग्रेसच्या सोशल मीडिया विभागाच्या तालुकाध्यक्षपदी संदीप पवार यांची निवड करण्यात आली असून, या निवडीमुळे पक्षाच्या स्थानिक संघटनात्मक बळकटीला नवे बळ मिळणार आहे. प्रदेशाध्यक्ष हर्षवर्धन सपकाळ यांनी नुकतेच संदीप पवार यांना नियुक्तीपत्र देऊन त्यांच्या जबाबदाऱ्यांची अधिकृत घोषणा केली.
सध्याच्या राजकीय परिस्थितीत सोशल मीडियाचे वाढते महत्त्व लक्षात घेता, काँग्रेस पक्षाने तालुका पातळीवर सोशल मीडिया संघटना अधिक मजबूत करण्यावर भर दिला आहे. या पार्श्वभूमीवर संदीप पवार यांच्यावर महत्त्वाची जबाबदारी सोपविण्यात आली आहे. राज्यातील सत्ताधारी पक्षाच्या धोरणांवर टीका करताना, सरकारची निष्क्रियता, तसेच जनतेच्या हिताच्या विरोधात घेतल्या जाणाऱ्या निर्णयांविषयी सोशल मीडिया माध्यमातून जनजागृती करण्याचे काम त्यांच्या नेतृत्वाखालील टीम करणार आहे.
संदीप पवार हे यापूर्वीही विविध सामाजिक व राजकीय उपक्रमांमध्ये सक्रिय राहिले असून, त्यांचा जनसंपर्क व संघटन कौशल्याचा अनुभव या नव्या जबाबदारीत उपयुक्त ठरणार असल्याची अपेक्षा व्यक्त केली जात आहे. त्यांच्या निवडीमुळे तालुक्यातील युवकांमध्येही उत्साहाचे वातावरण निर्माण झाले आहे.
या निवडीबद्दल काँग्रेसचे राज्य सचिव अॅड. रविकरण कोळेकर, तालुकाध्यक्ष प्रशांत साळे, शहराध्यक्ष अॅड. राहुल घुले, जिल्हा कार्याध्यक्ष अॅड. नंदकुमार पवार, तसेच मनोज ठेंगील, रवींद्र शिवशरण आणि ज्ञानेश्वर हर्डीकर यांनी संदीप पवार यांचा सत्कार करून पुढील कार्यासाठी शुभेच्छा दिल्या. तसेच सोशल मीडिया हे प्रभावी जनसंपर्काचे साधन असल्याचे नमूद करत, पक्षाच्या धोरणांची माहिती जनतेपर्यंत पोहोचवण्यासाठी तसेच विरोधकांच्या आरोपांना प्रभावी उत्तर देण्यासाठी या माध्यमाचा योग्य वापर करण्याचे आवाहन केले.
